Дотоод сэтгэлийн гэгээн хуудсууд

БУРХАНЛИГ ГЭГЭЭНТЭЙ НӨГЧСӨНДӨӨ БИ ҮНЭТЭЙ

Хаврын хавсарга намайг тоож

Хацар алгадан салхи нүднэ

Би баярлана

Би баярлахдаа

Дайран өнгөрөх салхин тоосыг

Даах сэтгэлийн борогшуу нь тэр

Салхи баярлана

Зуны халуун намайг тоож

Зулай төөнөн дээрээс жигнэнэ

Би баярлана

Би баярлахдаа

Жигнэн өнгөрөх зуны халуууныг

Жин даах тэвчээр нь тэр

Нар баярлана

Намрын бороо намайг тоож

Намирсан бас ширүүн бороо шаагина

Би баярлана

Би баярлахдаа

Шаагин өнгөрөх ширүүн бороог

Шазуур зуух тэнхээ нь тэр

Бороо баярлана

Өвлийн цасан намайг тоож

Өд мэт хөнгөхөн ч хоромхонд шуурна

Би баярлана

Би баярлахдаа

Шууран өнгөрөх хар хүйтэнг

Шуун үдэх ухаан нь тэр

Өвөл баярлана

Хүний заяатай ч муу санаатны

Хүсэл нь мохоо, хүйтэн үгсээс

Үхэл хүртэл дайжин зугтаж

Үнэн,гэгээнд шүтэн тэмүүлнэ

Би баярлана

Би баярлахдаа

Хийх үйлс, хэлэх үг

Бодох бодол, барих ухаан

Харах харц, хайрлах сэтгэл нь

Далай мэт гүн, цагаан бүхнийг

Үхэл тоох болохоор

Үхэл минь би чамдаа баярлалаа

Зориг, золбоонд минь чи дурлажээ

Үхэл минь би чамдаа баярлалаа

Бурханлиг гэгээнтэй нөгчсөндөө би үнэтэй

ЧАМААСАА УРВАЖ ҮЛ ЧАДНА ИХ ХАЙР МИНЬ...

Өөрөөсөө би урваж үл чадна эх хэл минь

Өрөөлийг сайхан хэмээн шуналтваас, үгс надаас зугтаж

Баян яруу аялгуу дундарч, бусдын соёл надаар даажигнана

Баян ядуу гэлтгүй доог тохуунд өртөж, барууныхан дамшиглана

Би би –гээрээ байж бүсгүйн хөгөөр

Баялаг номын өргөөнөө сэтгэлийн ураа нэмэрлэмүй

Чамаасаа би урваж үл чадна Их хайр минь

Чацархаг гээд хэн нэгэнд дурлаваас, үнэн надаас гутаж

Чин хайрын хөг солгойрч, дурлалын бурхан надаар даажигнана

Чимээгүйхэн бас чимэггүйхэн ёжлуулж ёс бус егөөнд нудруулна

Би би-гээрээ байж, чиний хөгөөр

Чинээлэг дурлалын өргөөнөө ухааны ураа нэмэрлэмүй

БАРДАМХАН СЭТГЭЛИЙН БАДАГ МӨРҮҮД МИНЬ...

Үнэнг надтай л хамт хайж

Үхлийг надтай л хамт угтах

Энэхэн орчлонгийн нэгээхэн давалгааны

Итгэл найдвар минь, инээд баясал минь, яруу үгс минь

Зүдрэлийг надтай л хамт туулж

Зүхлийг надтай л хамт мохоосон

Эгэл бор заяаны ихэмсэг ухааны

Эрч хүч минь, эвхрэшгүй тэвчээр минь, эвлэг шүлэг минь

Дундуурыг надтай л хамт дүүргэж

Доройг надтай л хамт сэргээсэн

Их омогшлын эрэлхэг зоригийн

Бадамласан зул, Бардамхан сэтгэлийн бадаг мөрүүд минь